Ps John
கிறிஸ்துவுக்குள் வாழ்த்துக்கள் நான் உங்களுடன் ஒரு சிறிய வார்த்தையைப் பகிர்ந்து கொள்ள விரும்புகிறேன்.
2 திமோத்தேயு 1:7 இல் பைபிள் சொல்கிறது, தேவன் நமக்கு பயமுள்ள ஆவியைக் கொடுக்காமல், பலமும், அன்பு,ம் தெளிந்த புத்தியும் உள்ள ஆவியையே கொடுத்திருக்கிறார். பயம் செயல்படும் போது, அங்கு அன்போ, மன அமைதியோ, வல்லமையோ இருப்பதில்லை. எனவே, இந்த மூன்றையும் தடை செய்யவே பயம் வருகிறது.
ஆனால், அந்தப் பயத்தின் ஆவியை நாம் எப்படி வெல்வது? தேவன் பயத்தைக் கொடுப்பதில்லை என்பதைப் புரிந்து கொள்ளுங்கள். அவர் வல்லமையைக் கொடுக்கிறார். அன்பைக் கொடுக்கிறார். தெளிந்த புத்தியைக் கொடுக்கிறார். பயத்தின் ஆவியை வெல்வதற்கு, உங்களோடு இருக்கிற, உங்களுக்குள் இருக்கும் தேவனை நீங்கள் உணர்ந்திருக்க வேண்டும். தாவீது, “நான் பொல்லாப்புக்குப் பயப்படேன்” என்றார். அதாவது, தீமை இருக்கிறது என்று எனக்குத் தெரியும், ஆனால் என்னை எதிர்கொள்ளும் தீமையை விட, என்னோடு இருக்கிற தேவன் பெரியவர் என்ற உணர்வு எனக்குள் இருக்கிறது என்று அவர் கூறினார்.
தேவனைப் பற்றி உணர்வு உள்ளவர்களாய் இருங்கள். விழிப்புடன் இருங்கள். பிரபஞ்சத்தின் படைப்பாளர் உங்களுடன் இருக்கிறார், உங்களுக்குள் இருக்கிறார், உங்களோடு கூட இருக்கிறார் என்பதை அறிந்து கொள்ளுங்கள். அவர் உங்களுக்காகத் தம்முடைய தூதர்களுக்குக் கட்டளையிட்டிருக்கிறார்.
அப்போஸ்தலனாகிய பவுலுக்கு அப்போஸ்தலர் நடபடிகள் 27-ம் அதிகாரத்தில் எந்தப் பயமும் இல்லை என்று சொன்னதற்கு என்ன காரணம்? தம்மோடு இருக்கிற தேவனைப் பற்றிய வெளிப்பாடு அவரிடம் இருந்ததுதான். எனவே, தேவன் உங்களுடன் இருக்கிறார் என்ற விழிப்புணர்வுடன் வெளியே செல்லுங்கள்.
அந்த நேர்காணல் அறையில் தேவன் உங்களோடு இருக்கிறார், அந்த தேர்வு அறையில் தேவன் உங்களுடன் இருக்கிறார், நீங்கள் செல்லும் சந்தையில் தேவன் உங்களுடன் இருக்கிறார். தேவன் உங்களோடு எப்பொழுதும் இருக்கிறார் என்பதை நீங்கள் உணரும் கணமே தேவனுடைய வல்லமையைச் செயல்படுத்துகிறது.
யாக்கோபு, “மெய்யாகவே கர்த்தர் இந்த இடத்திலிருக்கிறார், அது எனக்குத் தெரியாமற்போயிற்று” என்றார். தேவன் உங்களுடன் இருந்தும்கூட, உங்களுக்குத் தெரியாமல் இருப்பது சாத்தியம். “என் ஜனங்கள் அறிவில்லாமையினால் சங்காரமாகிறார்கள்”. எனவே, நீங்கள் தேவனுடைய பிள்ளையாக இருந்தும், தேவனைப் பற்றிய விழிப்புணர்வு இல்லாததால் இன்னும் பயத்தின் ஆவிக்கு அடிபணிந்திருக்கலாம்.
தேவன் உங்களுடன் இருக்கிறார் என்ற விழிப்புணர்வுடன் நடந்து கொள்ளுங்கள். இந்த விழிப்புணர்வுடன், நீங்கள் அநேக வாசல்களை வல்லமையாக திறப்பீர்கள்; அதாவது, தேவனுடைய சமாதானத்தை , தேவனுடைய அன்பை, தேவனுடைய வல்லமையை நீங்கள் அனுபவிக்க முடியும் .
அறிக்கை ஜெபம் (Faith Declaration & Prayer)
பிதாவாகிய தேவனே, இயேசுவின் நாமத்தில் உம்மிடம் வருகிறேன். நீர் எனக்கு பயமுள்ள ஆவியைக் கொடுக்காமல், பலமும் அன்பும் தெளிந்த புத்தியும் உள்ள ஆவியையே கொடுத்ததற்காக உமக்கு ஸ்தோத்திரம்.
நான் தேவனுடைய சமாதானத்தில் நடக்கிறேன், ஏனென்றால் தேவன் என்னோடு இருக்கிறார் என்பதை நான் அறிந்திருக்கிறேன்.
பிரபஞ்சத்தைப் படைத்த தேவன் என்னோடு இருக்கிறார், எனக்குள் இருக்கிறார், என்னை வழிநடத்துகிறார் என்கிற விழிப்புணர்வுடன் அறிக்கை செய்கிறேன்:
.
பயத்தின் எந்த ஆவிக்கும் என் வாழ்க்கையில் இடமில்லை; தேவனுடைய வல்லமையும், அன்பும், மன அமைதியும் என்னைச் சூழ்ந்திருக்கிறது.
நான் செல்லும் ஒவ்வொரு இடத்திலும் என் தேவனின் பிரசன்னம் என்னோடு கூடவே இருக்கிறது.
தீமையைக் கண்டு நான் பயப்படேன்; ஏனெனில் என்னை எதிர்கொள்ளும் எந்த சூழ்நிலையை விடவும், எனக்குள் இருக்கும் என் தேவன் பெரியவர்.
நீர் உம்முடைய தூதர்களுக்கு என்னைக் குறித்துக் கட்டளையிட்டிருக்கிறீர்; தேவனுடைய சமாதானமும் வல்லமையும் என் வாழ்க்கையில் கிரியை செய்கிறது.
— Pastor John, Life Giving Grace International Ministry
